lundi 27 avril 2009
شمعناها؟؟؟
ثمة حاجات كي نشوفهم قلبي يوجعني و المشكلة الي ديما نشوف فيهم!!!بالكش انا "حساسة برشة" و الا فهمي ثقيل.. تراه شوفو و قولولي بربي!!! شمعناها راجل ضرير يحط ميزان قدامو في قلب العاصمة وسط القهاوي المذخمة و خدمتو يوزن العباد بميات فرنك؟؟؟شمعناها راجل بقدرو و هيبتو عام 2009 يطبس يسيرج صباط فرخ واقف كالعرصة عند راسو؟؟؟ شمعناها مرا مقوسة ملوحة قدام دار ولدها في الشتاء متكية على كرهبتو تستنى في تاكسي؟؟؟ والا شمعناها مرا في قاطع الرقبة تفلح و راجلها يضرب في النفة قدام الدار؟؟اخطاني من قاطع الرقبة توة باهي شمعناها كي يبدا فمة ماتش كورة نولي ما نخرج من دارنا كان ما يسالني 200 حنش وين ماشية و منين باش نتعدى و كي نطل مالسطح كايني في نقل مباشر من غزة و اطفال الحجارة يضربوا اللوطة؟؟؟ شمعناها الذكي بوهالي و البهيم يقرص و يدو تحتو و النية خبيث و الفدلاك يتكومك؟؟؟؟ شمعناها كي نحب نشري جريدة ما نلقاهاش و كي منحبش نشري جريدة اخرى يقريوني فيها بالسيف؟؟؟ شمعناها كي ندشنو حاجة جديدة هوني لازم نزينو البلاصة بالزنسفوري؟؟؟شمعناها كي نحب "نوصل" لازم يختارولي ثنيتي؟؟وين نوصل؟؟كان عالخدمة قالولي "حقك" ..كان عالجاه ماحاجتيش بيه خاطر كلنا بقدرنا تسمع فيا؟؟كلنا بقدرنا!!! وكان عالفلوس ما نحبش "نوصللهم" كبفك باهي؟؟ و هكة و الا هكة انتي باش تاخوهملي مبعد و انا غنية بلاش بيك و من غير ثنيتك و انتي بفلوسك و فلوسي و فلوس الناس كل فقير

0

vendredi 3 avril 2009
الى ثلة من المتكعلصين المجهولين الفواضل
عندي مدة ما كتبت شيئ و برشة "مجهولين" يسخايلوني استجبت لرغبتهم المتمثلة في تركي للكتابة او "نصحهم " لي بذلك. اخواني مجهولي الهوية جيتكم عزيزة اما طلبكم بالطبيعة مرفوض.اولا خاطر حججكم ما اقنعتنيش كما ينبغي خيث ان البعض منكم "تبلانجا" عليا من غير "مايو" يكبلي في سعدي "بالتي هي احسن" قال شنوة انا متطفلة على المجال و بقعتي في الكوجينة.وثانيا خاطرهم "ما مدوش وجوهم" كما ينبغي بالعنوان متاعهم و الا حتى اسماءهم الاصلية و انما اتوا باسماء مقتبسة عيني عينك من المنتجات التلفزية التركية.و يا حسرة على اسامي العادة و العوايد.لا محمد لا عمر لا كريم لا خالد لا والو. الي اسمو "ريان" و الي "ثامر" و الي "مازن" و غيرهم من ذوي العقد النفسية الناجمة عن عدم تقبلهم لواقعهم.اما عفوا يا شسمك انا راني مانيش دكتور "فيل" الي تبقق في عينيك فيه هو و غيرو من منتجات ال م.ب.س تفاهة الفضائية و بعد تقص على مدونتي "كالبسكلات" تقول خنفددها بشوية تعاليق.انا نقترح على بعض البؤساء منكم كان يمشي يتعلم كيفية رسم الهمزة في اللغة العربية كخطوة اولى لمغادرة ثقافتهم المهندية باش كي يكتب تعليق ما يحشمش روحو. و تفكرت توة هاك اللقيط(بما انه مجهول) الي قالي "بر امتهن الخياطة خيرلك راك ماكش باش توصل تتفوق على المدونين متاعنا" انا المجهول هذا كان نشدو لما انحيلو حوايجو بعدها السيد يحتقر في مهنة الخياطة.مالة ينزع دبشو و يبقى عريان كي مخو بالظبط.و بعد هذا و دونو شكون قالو الي انا نحب انافس المتواجدين.هذا فكرني بهاك الحثالة الي "يامرون بالمعروف" في طنبك الحضب و المعامع.تلقاه لا يعرف لا الضارب لا المضروب اما يكتفي بسرد المواعض من نوع "تي صليوا عالنبي راكم رجال موش متاع هذا" و لوج عاد شنوة "هذا" يندرى يقصد بها العرك و الا الهزيمة و بالطبيعة في قالب عركة المعنى الثاني اصح و يزيدوا "الاكباش" يلحموا و يبداو الحثالة لاعبينها ابطال قد ما تاكل بعضها اكثر و كعبة الشماتة و اللذة في قلوبهم قد راس البقري..مالة يا حثالة العصر المنفتحين على عالم الانترنت الي انا حقيقة مستخسرتها في الفصائل الي كيفكم ما عندكم وين توصلو معايا هاوكة سبقتهالكم و نعاودلكم مايسالش نعرفكم فهمك ثقيل و على درجة كبيرة من الطسطيك راني انا مانيش هوني لغاية منافسة القدامى و "المتزلزين" كيما قال احد المنحطين منكم و علاقتي طيبة بيهم و لن تشوبها شائبة.
و اخيرا من اهم دواعي اتيقيري منكم هو انكم قاعدين ادعمو في ازمة الهوية التي نعيشها على مضض.تي السردوك ساقيه في الخرا وهو يذن؟؟؟

3