jeudi 19 mars 2009
لا يحقلك حق

انا و اعوذ بالله من كلمة انا فيا "عفسة" مانحبش التنبير اما الشي اللي قاعد يصير ينطق الهوايش حاشاكم.ايا سيدي هاك الليلة قلت خنخرج من جحري ولا كيفما تسميه ماماتي "بيت السر" و نتواضع و نسهر مع الدار مريرة ما فيها باس. و فعلا دقني ربي و غادرت عالمي نلقى الجماعة "مبهمين " يتفرجوا في "اعادة 7 " في تمنييكة اسمها "الحق معاك" ..كمشة محامين و منشط حليلتو ملمومين "في الخير" في استوديو "مشره" حيث يسلم ربي و فليسات "كاكتوس" و مسجات الشعب و ليلا بيبي (يا حسرة عالحوالي توة حاشاكم حتى مالخرا عملولو مغارف ) اي عاد قتلكم الشكاية الاولى جا فيها محامي في الساقين..مرية هجالة رويجلها توفى في حادث شغل وكلت محامي "اصيان" باش تاخو الغرامة اللي قدرت ب 193 الف دنوس..و بالفعل و نحن في دولة العدالة و الكفاءات و الفرح الدائم ربح سي وخينا القضية..ولكن مسيرتو الطويلة في سلك المحاماة بكل ما تحمله مهنة المحاماة في تونس الخضراء من "جو عالمي في الشنقر ونقر "ما كفاتش صحيبنا و رقد على فليسات المرا يفندق و يبندق و هيا المغبونة تربي في اليتامى بالهواء و ماشية جاية كي الذكاء متاعنا ,على بيرو السيد و هوا يدوهن و يمهطل فيها لين حطت الساق عالساق و "تذكات" و طالبتو بنومرو القضية لتكتشف النايرة و تطالبو بفلوسها فيعترف لكن يطلب منها مديدة (بالتوقيت التونسي,حقا عاد ارتعوا فيها هاو حافظولنا عالسويعة باش نزيدو نشيييخو بالنوم العميق ) ايا فدت المرا مالمستنية كيفما فديتو انتوما توة و قالت فالحما يا اعلام و شايلله سيدي سامي...سيدي سامي ,يسود وجهي انا مايسالش, فريقو الصلاة عالنبي "ف.ب.ا" على حالها.يا سيدي مانكثرلكش الراجل شوية اخر يطبوا عليه في "التواليت" ...دون عاد الكاميرات الخفية و المؤثرات الصوتية تقول فيلم اكسيون و "النوار اي بلن" بالكش الصحفية عندها الحبوب ولى "البوان نوار" في وجهها انا قلت.. حاصيلو رغم مجهوداتهم "الجبارة " محامينا "المتهم" النسمة و حلق الواد...ايا كي ماعاش بيها وين وجهولوا انذاراتهم بكل حزم..اااه وييي نحن لا نرمي الورود قالولو بكل رباطة جاش و بالحرف الواحد "الزميل المحترم ماداموا مازال يتمتع بكل حرياته ماذابيه يمشي يبيع عقار من عقاراتو قبل ما ياخو القانون مجراه و تاخذ عمادة المضامين قرارها و مدامها السيدة متفهمة و قابلة للصلح"...تي مش شي يشرب الكول هذا تي كان العبد هذا "زميل محترم" انا هاني ظهرت "باباصة" على الاقل اخر خاجة "كرفتها" دينار لايت من تاليفون امي..ولى السيدة الي قابلة للصلح تتمنيك على 10 ملاين تونسي للا ؟ تسالو كروية ولا فلوس؟ تي حتى الكروية باهية للغاز و ما تتحقرش ولا بالك سانتا ماريا وانا قلبي اكحل محمم ؟ على كل حال لم و لن ادرك هذا المستوى من التسامح برجولية 193 مليون "سي كالكو شوز" قال القاوري..وهوكا ربي يعرف شيعمل حتى هوة معايا ..الحاصل يا سيدي ضحكو علينا بالصبع واحنا نقولو "يحي العدل" و هوما يا ناري قريب يبكيو على وضعية "زميلهم الفاضل" و "الانذارات القاسية الي وجهوهالو" مع العلم و انهم عادة الي يجي يعفسوا في والديه..اخرتها بسبب تهكماتهم, الي ما وقعتش طبعا مع "زميلهم", ثمة رئيس بلدية طار رغم الي مهوش هوة الي قام بالتجاوزات الي ادلى بيها "نجم" الحلقة الفارطة,و لكن الرئيس الي قبلو...حاصيلو مبعد رهطنا على "الحق" و لا تغرنكم الاستوديوهات الفسيحة و المحامية اللبقة المليحة راهو الشي الى يعديوا فيه فضيحة و سايبوني لا نقول فيها وووه و ترصيلي نلوج في "مضام" ياخولي حقي و نشارك في "لا يحقلك حق" و كمل وحدك عاد


0

Enregistrer un commentaire

مرحبا زارتنا البركة.. قول الي في قلبك الكل و اش عليك في الباقي